Wednesday, December 23, 2015

යුරෝපීය රටක නිවාඩුවක්!

මිතුරනි, අද මම සූදානම් වෙන්නේ ඔබට අලුත්ම අත්දැකීමක් ලබා දෙන්න. මෙතෙක් කල් මම දේශීය සංචාරයන් ගැන ලිපි රාශියක් ලියල තියෙනවා. අද මම ඔබට විදෙස් සංචාරයක අත්දැකීමක් ලබා දෙනවා. මම ඔබව ‍රැගෙන යන්නේ ඉතා සුන්දර යුරෝපීය රටකට. ඒ රටේ සැබෑ සංචාරක අත්දැකීමක් සමඟින්. ඒ තමයි ස්වීඩනය. ස්වීඩනය උතුරු යුරෝපයේ ස්කැන්ඩිනේවියානු අර්ධද්විපයේ පිහිටි රටක්. එහි විශාලත්වය ලංකාව මෙන් 7 ගුණයකට ආසන්න වෙනවා. (වර්ග කි.මී. 450,295) නමුත් ජනගහනය ලංකාවේ මෙන් භාගයකටත් අඩුයි. (මිලියන 9.2) රටේ උතුරු ප්‍රදේශ උත්තරධ්‍රැවයට ආසන්න නිසා අධික ශීතලකින් යුක්තයි. ජනතාව බහුලව ඒකරාශී වී සිටින්නේ රටේ දකුණු ප්‍රදේශවලට වන්නටයි.
ස්වීඩනයේ අගනුවර ස්ටොක්හෝම්. මම ඔබව රැගෙන යන්නේ, ගොතන්බර්ග් (Gothenburg) නගරයට. ගොතන්බර්ග් කියන්නේ ස්වීඩනයේ දෙවන විශාලතම නගරය. මේ තියෙන්නේ මම නවාතැන්ගත් හෝටලයේ සිට දකින නගරයේ එක්තරා පැතිකඩක්.


මේ ශීත ඍතුවේ ආරම්භය! උෂ්ණත්වය 0C ත් 8C ත් අතර අගයක් ගන්නවා. ඒවගේම හිරු එලිය පැවතුනේ දවසකට පැය 6ක් හෝ 7ක් වගේ කාලයක්. ඒකත් ඉතා අඩු එලියක්. මේ තියෙන්නේ ගොතන්බර්ග් වල තියෙන විශාල සාප්පු සංකීර්ණයක් (shopping mall). නෝඩ්ස්ටන්. ඔය ඡායාරූපය ගනිද්දී වෙලාව උදේ 9ට විතර ඇති. බලන්න අඳුර! දකුණේ තියෙන්නෙ එහි ඇතුලත දර්ශණයක්.

යමු මාත් එක්ක.... නගරයේ ඡායාරූප ටිකක් බලන්න....

ස්වීඩනය කියන්නේ ඉතා දියුණු පොදු ප්‍රවාහන සේවයක් තියෙන රටක්. දුම්රිය, බස් රථ වලට අමතරව විදුලි දුම්රිය (ට්‍රෑම්ප්) සේවයත් එරට තුල ක්‍රියාත්මකයි. බස් හෝ ට්‍රෑම්ප් නැවතුම් පොලවලට නියමිත නමක් තියෙනවා. එහි සවිකර තියෙන පරිඝනක තිරයක, ඉදිරියේ පැමිණෙන බස්/ට්‍රෑම්ප් ගමන් මාර්ගය, පැමිණීමට ගතවන කාලය යනාදී සියලු විස්තර දර්ශණය වෙනවා. බස්/ට්‍රෑම්ප් රථ සියල්ල හීටර්ස් මගින් උණුසුම් කර තියෙනවා. බස් තුලත්, ඉදිරියට හමුවන නැවතුම් පොලවල් හා ගතවන කාලය ආදී සියලු විස්තර ඩිජිටල් පුවරු වල දර්ශණය වෙනවා. ඊට අමතරව රථය තුල ඇති පටිගත කල හඬ පට වලින්ද ඉදිරි නැවතුම් පිලිබඳ මගීන්ට දන්වනවා.
ස්වීඩනයේ පොදු ප්‍රවාහන සේවය ලබාගැනීමට ඔබට මාසික ගාස්තුවක් ගෙවා කාඩ්පතක් මිලදී ගැනීමට සිදුවෙනවා. ඒ කාඩ්පත ලඟතබා ගැනීමෙන්, නගරය තුල, අදාල මාසය ඇතුලත, ඕනෑම වාරගනනක්, බස්/ට්‍රෑම්ප් සේවය ලබාගැනීමට පුලුවන්. උඩ තියෙන්නේ ට්‍රෑම්ප් රථයක් ඇතුලත දර්ශණයක්.

ඒ වගේම ස්වීඩනය කියන්නේ, පංති භේදය, ස්වාමි-සේවක පරතරය වගේ දේවල් ඉතා අඩුවෙන් තියෙන රටක්. මම ගියා ගොතන්බර්ග් වල තියෙන සුපිරිවෙලඳසලකට. ලංකාවේ සුපර් මාකට් වල වගේ අඩු පඩියට වැඩකරන සේවකයන් ඒවායේ නැහැ. ඒ වෙනුවට ඉන්නේ ඉහල වැ‍ටුප් ලබන ගෞරවනීය කාර්ය්‍යමණ්ඩලයක්. භාණ්ඩ කිරාගැනීම, කැෂියර්ට තමන්ගේ භාණ්ඩ වෙන්කරදීම, කාඩ්පතකින් මුදල් ගෙවයි නම් එය යන්ත්‍රයට ඇතුල් කිරීම සහ මුදල සටනන් කිරීම, ඒ විතරක් නෙවෙයි, තමන් මිලට ගත් භාණ්ඩ මල්ලට දමා ගැනීම පවා පාරිභෝගිකයාට අයිති කාර්යයක්.

මේ තියෙන්නේ ගොතන්බර්ග් වල නියොන්ගටාන් (Neongatan) ආසන්නයේ ඇති පාරක්. ඔව්, යුරෝපීය රටවල වාහන යන්නේ පාරේ දකුණු පැත්තෙන්. වාහනවල රියදුරු ආසනය තියෙන්නේ වම් පැත්තේ. ඒ වගේම Toyota, Honda, Nissan වගේ ජපන් වාහන ඉතා අඩුයි. ඒ වෙනුවට තියෙන්නේ, ස්වීඩනයේම නිෂ්පාදනය කරන Volvo, ඒවගේම BMW, Audi, Volkswagen, Mercedes වගේ ජර්මන්, UK කාර්. ස්වීඩනයේ මම දැකපු තවත් දෙයක් තමයි රියදුරන්ගේ විනය. වට රවුමකදී හැකිතාක් අනිකාට ඉඩදීම ස්වීඩන් රියදුරන්ගේ ප්‍රතිපත්තියක්. ඒවගේම  පදිකයෙක් සුදු ඉරක් (එහේ කහ ඉරි නෑ. ඒ වෙනුවට තියෙන්නේ සුදු ඉරි) ආසන්නයේදී ගමන්වේගය අඩු කලත්, රියදුරන් තමන්ගේ වාහනය නවත්වා ගන්නවා. ඒවා දකිනකොට ලංකාවේ රියදුරන් ගැන ලැජ්ජාවක් ඇතිවෙන එක වලක්වගන්න බෑ.
හැබැයි, මේ දේවල් වලට මාර්ගවල ගුණාත්මකබවත් ඉහල බලපෑමක් එකතු කරනවා.  පළල් පාරවල් වගේම පදිකයින්ට සහ පාපැදිකරුවන්ට වෙන්වූ මාර්ග තීරුත් සෑම පාරකම පාහේ තියෙනවා. මාර්ග තදබදය කියල දෙයක් නම් ඇත්තෙම නෑ.
ස්වීඩන් වැසියන් ඉතා සංග්‍රහශීලී පිරිසක්. වෙළඳසලකදී හෝ වෙනත් ඕනෑම තැනකදී, ඔබ යමෙක් සමඟ සංවාදයකට මුලපුරනවා නම් "Hey" යනුවෙන් පැවසීම සිරිතක්. එය ඔවුන් සලකන්නේ, සංග්‍රහශීලීත්වයේ සහ සුහදශීලීත්වයේ සලකුණක් විදියට.
නෝඩ්ස්ටන් වලට ආසන්නයේ, "Liseberg" නමැති විශාල විනෝද උයන පිහිටල තියෙනවා. ඒක ලංකාවේ Leisure world වලට වඩා කිහිප ගුණයකින් විශාලයි. ඒ වගේම එහි තියෙන සුවිසාල Roller coaster සහ වෙනත් විනෝද උපකරන ලංකාවේ දකින්න නෑ. මේ "Liseburg" උයන අයිති වෙන්නේ ගොතන්බර්ග් නගර සභාවට. එසේත් නැත්නම් ස්වීඩන් රජයට. ඔවුන් මේකෙන් විශාල ආදායමක් ලබනව වගේම, හොඳින් නඩත්තු කටයුතුත් කරනවා.

සමුගන්න කලින් "Liseberg" වල වටයක් යමු.
හොඳයි... මට යන්න වෙලාව හරි. මම මේ සංචාරය තුලින් විශාල අත්දැකීම් ප්‍රමාණයක් ලබාගත්තා. ඒ වගේම ගොඩක් විනෝද උනා. ඔබත් මේ ලිපිය තුලින් එහි කොටස් කාරයො වෙන්න ඇති කියල හිතනවා. එහෙනම් තවත් දවසක රසබර ලිපියකින් හමුවෙන තුරු, ගිහින් එන්නම්.. සුබ දවසක්!
read more "යුරෝපීය රටක නිවාඩුවක්!"